2017 წლის 6 სექტემბერს ქ. ზუგდიდის ტექნოპარკში კონსორციუმი სამართლებრივი დახმარება საქართველო-ს ორგანიზებით მოეწყო შეხვედრა სამეგრელოსა და აჭარის რეგიონებში დევნილთა საკითხებზე მომუშავე სათემო და არასამთავრობო ორგანიზაციებთან.
შეხვედრის მიზანი იყო რეგიონში ადვოკატირების კამპანიის საკითხის შერჩევა, შესაბამისი სამუშაო ჯგუფის ფორმირება და სამომავლო საქმიანობის დაგეგმვა. საერთო პრობლემის და ჯგუფის შემადგენლობის განსაზღვრა ფარული კენჭისყრის საფუძველზე, გამჭვირვალეთ და მონაწილეთა აქტიური ჩართულობით განხორციელდა.
აღნიშნული შეხვედრა მოეწყო „სამართლიანი საზოგადოებისკენ“ პროექტის ფარგლებში, რომელიც ხორციელდება საქართველოს რამდენიმე რეგიონში პარტნიორ ორგანიზაციებთან - ლტოლვილთა დანიის საბჭოსა და საქველმოქმედო ჰუმანიტარულ ცენტრთან „აფხაზეთი“ ერთად. პროექტის მიზანია რეგიონული სათემო და არასამთავრობო ორგანიზაციების შესაძლებლობების გაზრდა დევნილთა უფლებების დაცვის მიზნით. პროექტის მხარდამჭერია სამოქალაქო საზოგადოების განვითარების ფონდი (CISU).